dainikonlinenews

सोमबार, ६ पुष
काठमाडौँ । राष्ट्रिय महिला आयोगले विवाह पञ्चमीका दिन जनकपुरस्थित जानकी मन्दिरमा राष्ट्रपति विद्यादेवी भण्डारीमाथि आन्दोलनरत संयुक्त लोकतान्त्रिक मधेसी मोर्चाका कार्यकर्ताद्वारा गरिएको आक्रमण, दुव्र्यवहार तथा अपमानजनक अभिव्यक्तिप्रति गम्भीर ध्यानाकर्षण भएको जनाएको छ ।

महिला भएकै कारण उहाँमाथि गरिएको यस प्रकारको विभेदपूर्ण, अमानवीय, अमर्यादित व्यवहारले सम्पूर्ण महिला जगत्को अपमान गरेको आयोगको ठहर छ । आयोगले उक्त कार्यको घोर निन्दा र भत्र्सना गर्दै दोषिमाथि कडा कारबाही गर्न सरकारसमक्ष जोडदार माग गरेको छ ।
आयोगका सदस्य एवम् प्रवक्ता उर्मिलादेवी विश्वकर्माले आज एक विज्ञप्ति जारी गरी राष्ट्रपतिमाथि गरिएको दुव्र्यवहार मानव सभ्यताकै कलङ्कका रुपमा चित्रित हुन पुगको उल्लेख गर्दै आगामी दिनमा यस प्रकारका घटना हुन नदिनेतर्फ विशेष सतर्कता अपनाउन सरकार र आन्दोलनरत पक्षसँग अपिल गरेकी छिन् ।
nepalsandesh

सोमबार, ६ पुष
प्याकेजमै सहमतिका लागि छलफल भैरहेको दाबी
काठमाडौं । संघीय समाजवादी फोरम नेपालका अध्यक्ष उपेन्द्र यादवले जानकी मन्दिरमा कुकुर प्रवेश गरेकाले गंगाजल पर्किएको दाबी गरेका छन् ।

उनले राष्ट्रपति विद्यादेवी भण्डारीको भ्रमणका कारण यस्तो नगरिएको दाबी समेत गरे । यादवले आफ्नो दल निकट पत्रकारहरुसँग कुराकानी गर्दै जानकी मन्दिरमा राष्ट्रपति जाँदा कुकुरहरु समेत प्रवेश गरेकाले मात्र गंगाजल छर्किएको दाबी गरेका हुन् ।
विवाह पञ्चमीको अवसरकार राष्ट्रप्रमुख भण्डारी त्यहाँ पुगेकी थिइन् । यादवले विधवा प्रवेश गरेकाले गंगाजल छर्किएको भनेर वाइयात समाचार आएको भन्दै त्यसको खण्डन समेत गरेका छन् ।
उनले कुनै पनि विधवालाई कुनै पनि मन्दिरमा प्रवेश रोक नभएकाले यस्तो समाचार गलत ढंगले आएको बताए । उनले बुट सहितका सेनाले कुकुरलाई मन्दिर सँघाएर अपवित्र बनाइएकाले त्यसपछि सरसफाई गरिएको बताएका हुन् ।
यादवले जारी मधेस आन्दोलन प्याकेजमै समाधानकालागि सत्तारुढ र प्रमुख प्रतिपक्षीसँग छलफल भैरहेको बताए ।
उनले छलफल सकारात्मक भएको र सरकारले चाहने हो भने शुक्रबारसम्म सहमति बन्ने बताए । उनले सरकारले नचाहेसम्म सहमति नहुने पनि बताए ।
nepalsandesh

विराटनगर, ६ पुस । प्रधानमन्त्री केपी शर्मा ओलीले मुलुकमा शान्ति कायम राख्न र साम्प्रदायिक द्वेष फैलिन नदिन सरकार सचेत रहेको बताउनुभएको छ ।
विराटनगर विमानस्थलमा आज पत्रकारसँग सङ्क्षिप्त कुरा गर्दै प्रधानमन्त्री ओलीले सरकार वार्ताद्वारा समस्या समाधान गर्न तयार रहेको प्रस्ट पार्नुभयो ।

उहाँले नेपाली जनताको भावनाअनुसार संविधान जारी भएको बताउँदै मुलुकको स्थायित्व र संविधान कार्यान्वयनका लागि एकजुट भएर अगाडि बढ्नुको विकल्प नरहेको उल्लेख गर्नुभयो ।
प्रधानमन्त्री ओलीले नाकाबन्दी, धर्ना, एम्बुलेन्स तोडफोड गर्नु कुनै बहादुरीको काम नभएको भन्दै आ–आफ्ना कुरा शान्तिपूर्ण ढङ्गले राख्नुपर्नेमा जोड दिनुभयो । उहाँले भन्नुभयो– अहिले भइरहेको नाकाबन्दी, धर्ना र एम्बुलेन्स तोडफोड कार्य कायरताको पराकाष्ट हो ।
उहाँले सरकारको दुई महिनाको अवधिमा पुनःनिर्माणसम्बन्धी विधेयक संसद्बाट पारित भएको, सीमा नाकाहरु सहज भएकोलगायतका धेरै काम भएको दाबी गर्नुभयो ।
उहाँ विराटनगर विमानस्थलबाट सुनसरी–इटहरीमा आज आयोजित पार्टीको कार्यक्रममा सहभागी हुन यहाँ आउनुभएको हो ।
dainiknepal

काठमाडौं । यदि कुनै अदृश्य खेल भएन भने यसै साता भारतले नेपालमाथि लगाएको अघोषित नाकाबन्दी अघोषित रुपमै अन्त गर्नेछ । कूटनीतिक च्यानलहरुबाट प्राप्त विश्वस्त जानकारीका अनुसार, नाकाबन्दी खुलाउने रोडम्याप तय भइसकेको छ । मधेसी मोर्चाले अन्तिम धक्का भनेर घोषणा गरेको आन्दोलन पनि यही रोडम्याप कार्यान्वयवकै लागि हो । सीधै उधारो सम्झौता गरेर जाँदा मधेसमा आफूले उकासेको मान्छेहरुले आफैँलाई लखेट्ने डरले मोर्चाका नेताहरु फेस सेभिङ्को उपायमा लागेका हुन् ।

नाकाबन्दी खुलाउने पछिल्लो रोडम्याप अनुसार प्रदेशहरुको सीमाकंन टुंगो लगाउन एक उच्चस्तरीय राजनीतिक संयन्त्र गठन हुनेछ । सीमाकंन हेरफेरको सुनिश्चिततासहित मोर्चालाई मनाउन भारतले पञ्यास गरेकाले यो सम्भव भएको हो ।
नयाँदिल्ली स्रोत भन्छ, शुरुमा संसदीय समिति भनिएको थियो तर त्यसो गर्दा महन्थ टाकुर र राजेन्द्र महतो संयन्त्र बाहिर पर्ने भएकाले उच्चस्तरको राजनीतिक संयनत्र बनाउने सहमति भएको छ । यो संयन्त्रले तीन महिनाभित्र सीमाकंनको विवाद मिलाउनेछ ।
सीमाकंन विवाद मिलाउने क्रममा झापा, मोरंग र सुनसरीलाई भने टुक्र्याइएको छैन् । ती जिल्लालाई २ प्रदेशमा पनि राखिने छैन् । यदि तिनै जिल्लाको विवादका कारण कुरा नमिल्ने अवस्था आएमा कोशी पूर्व अलग्गै विशेष प्रदेश बन्नेछ । त्यसो भएमा सगरमाथाका जिल्लाहरु २ नम्बर प्रदेशमा थपिनेछ । पश्चिम तराईमा थारुको माग पूरा गर्न कैलाली जिल्ला फुटाइनेछ ।
कैलालीको थारु बाहुल्य खुटियाखोला पूर्वको भागलाई बाँके बर्दियासहितको प्रदेशमा मिलाउने गरी सीमाकंनको टुंगो लगाउन लागिएको उच्च स्रोतले जनाएको छ । यही रोडम्याप अनुसारको सहमति गरेर नाकाबन्दी यसै साता २०७१ माघ १०/११ गतेसम्म खुलाउने प्रयास भइरहेको छ । साँघु साप्ताहिकमा खबर छापिएको छ ।
dainiknepal

इटहरी, पुस ६ । प्रधानमन्त्री केपी शर्मा ओली सोमबार सुनसरीको इटहरी आउने समाचार पाएका संयुक्त मधेसी मोर्चाका कार्यकर्ताले दुहवी बजारमा कालो झण्डा प्रदर्शन गरेका छन् ।
नेकपा एमालेका अध्यक्ष रहेका प्रधानमन्त्री ओली एमाले सुनसरीको दोस्रो जिल्ला परिषद् बैठकमा सहभागी हुन विराटनगर हुँदै इटहरी आउने भएपछि मोर्चाका नेता तथा कार्यकर्ताले दुहवी सडकखण्डमा अवरोध सिर्जना गर्दै कालो झण्डा प्रदर्शन गरेका हुन् ।

कालोझण्डा प्रदर्शन गरिरहेका मोर्चाका नेता तथा कार्यकर्तालाई तितरवितर पार्ने क्रममा प्रहरीले लाठी प्रहार गर्दा मुन्ना साह, रामेश्वर मण्डल, एसएन मेहता र रन्जित गोश्वामीलगायत घाइते भएका छन् ।
प्रहरीले सडकमा अवरोध सिर्जना गरिरहेको अवस्थामा सुनसरी औरावनीका महेश यादव, भुपेन यादव, खेलन यादव, पप्पु गोश्वामीलाई नियन्त्रणमा लिएको छ । पक्राउ परेकालाई इलाका प्रहरी कार्यालय दुहवीमा राखिएको छ ।
यता कार्यक्रम स्थल इटहरी उपमहानगरपालिका–८ स्थित जनता प्राथमिक विद्यालयका खेल मैदान तथा आसपासका क्षेत्रमा ठूलो सङ्ख्यामा नेपाली सेना, सशस्त्र प्रहरी बल र नेपाल प्रहरी तैनाथ गरिएको छ । सहरको विभिन्न सडक तथा गल्लीमा सुरक्षा जाँचलाई कडा बनाइएको छ ।
जिल्ला सुरक्षा समितिले पनि प्रधानमन्त्रीको कार्यक्रममा कुनै पनि व्यवधान उत्पन्न नहोस् भनेर ठूलो सङ्ख्यामा सुरक्षाकर्मी परिचालन गरिएको जनाएको छ । अर्कातर्फ एमालेको भातृ सङ्गठन युवा सङ्घ र अनेरास्ववियुका स्वयम्सेवक दस्ता पनि ठूलो सङ्ख्यामा परिचालित भएका छन् ।
imagekhabar

Home