dainikonlinenews

अभिमन्यु
भारतले वीरगञ्ज नाका बाहेक अरु नाकाहरु खोल्ने भएको समाचार शनिवार र आइतवार संचारमाध्यमहरुमा छाइरहेको छ । यसरी भारतले नाकाहरु खोल्न थाल्नुको भित्री रहस्य भने गम्भीर रहेको उच्च श्रोतहरुले जानकारी दिएका छन् ।

नेपालमा भारत विरोधी भावना बढेकोले मात्र यसरी नाका खोल्न थालेको होइन भन्ने उच्च स्राेतकाे भनाई छ । भारत विरोधी भावना नाकावन्दी गरेपछि बढ्छ भन्ने कुरा भारतीय नेताहरुलाई थाहा नभएको विषय होइन । त्यो भन्दा पनि भारतीय नेताहरु र त्यहाँका उच्च अधिकारीहरु भारत विरोधी बन्न पुगेका ओली र प्रचण्डको गठवन्धन अझ मजवुत वन्न थालेको र ओली नै आगामी प्रधानमन्त्री बन्ने देखेर त्यसवाट भविश्यमा आउने गम्भीर परिणामबाट अझ सशंकित भएको बताइन्छ ।
त्यसैले एक कदम पछि हटेर भारतीय नेताहरु नाकाबन्दी अलि खुकुलो वनाएर ओलीलाई कुनै पनि हालतमा प्रधानमन्त्री हुन नदिने कसरतमा लागेको बताइन्छ । यसका लागि भारतीय नेताहरुले नेपाली कांगे्रशका शुशील कोइरालालाई नै प्रयोग गर्न सकिन्छ कि भनेर तीब्र प्रयास थालेको बताइन्छ ।
कोइरालाको पुख्र्यौली सत्ता मोह, प्रधानमन्त्री बनेर पार्टी भित्रको चुनाव लड्न पाए सभापतिमा जितिने आशा, अहिले पार्टी भित्रको चुनावमा देउवा पक्ष हावी हुन सक्ने डर, यसो भएमा कांग्रेसको चावी कोइराला परिवारबाट सदाका लागि गुम्ने खतरा आदिबाट त्रसित स्थितिको फाइदा उठाएर भारतीय नेताहरुले सुशील कोइरालालाई प्रधानमन्त्री पदमा समर्थन गर्ने सूचना पठाएपछि नेपाली राजनीतिको खेल पुनः भारतीय बाजाको तालमा नाच्न थालेको श्रोतले बताएको छ ।
यसका लागि कोइरालाले नाकावन्दी अलि खुकुलो वनाइदिन अनुनय विनय गरेको बताइन्छ । यसै बृहत योजना अनुसार नै नाकाबन्दी अलि खुकुलो गर्न थालिएको र काठमाडौंको लागि सबभन्दा नजिकको वीरगञ्ज नाका नखोलेर एउटा तरबार भने कोइरालाको टाउकोमा झुण्ड्याइरहेको बताइन्छ ।
अहिले नाकावन्दी खुकुलो गरि भारत समर्थक प्रधानमन्त्री वनाउने र चीनको बाटो इन्धन ल्याउने निर्णय सरकारी तवरमा नगराउने जाली झेली तरिका पनि भारतले अपनाउन थालेको समाचारमा जनाइएको छ । नाकावन्दी भएको यतिका दिन भैसक्दा पनि चीनवाट इन्धन ल्याउने निर्णय सरकारले नगर्नुको रहस्य जनताले खोज्नु पर्ने भएको छ ।
www.nepalsandesh.com

१७ असोज, काठमाडौं । एकीकृत नेकपा माओवादीका अध्यक्ष प्रचण्डले आफ्ना कार्यकर्ताहरुलाई मधेसको आन्दोलनबारे एउटा रोचक कथा सुनाएका छन् । नयाँ संविधानबारे जनतालाई ठीक ढंगले बुझाउन नसक्दा गलत मान्छेहरुले भ्रम छरेको भन्दै प्रचण्डले नयाँ संविधानलाई मीठो फलसँग तुलना गरेका छन् ।
मधेसमा भइरहेको आन्दोलनतर्फ संकेत गर्दै प्रचण्डले जनताका लागि मीठो फलका रुपमा आएको संविधानलाई डरलाग्दो भनेर प्रचार भइरहेको बताए । काठमाडौंमा सम्पन्न नेवा, ताम्सालिङ र तमुवान जिल्लास्तरीय अगुवा कार्यकर्ता प्रशिक्षणमा प्रचण्डले ‘छप्ल्याङ’को कथा सुनाए ।
पञ्चायतविरुद्ध ०४६ साल आन्दोलनको बेला आफूले छप्ल्याङको कथा खुब भन्ने गरेको भन्दै प्रचण्डले कार्यकर्तालाई यसरी सुनाए :

‘छप्ल्याङ आयो, छप्ल्याङ आयो ‘

एउटा विशाल जंगलमा धेरै जनावरहरु चर्ने गर्थे । जंगलको बीचमा पोखरी थियो । पोखरी छेऊमा मृग चर्दै थियो । पोखरीकै आडमा भएको आँपको रुखबाट पोखरीमा आँप खस्यो । माथिबाट आँप खस्दा ‘छप्ल्याङ’ गर्‍यो । त्यो मृगले के हो भन्ने थाहा पाएन र छप्ल्याङ गरेपछि तर्सिएर भाग्यो ।
त्यो जोडतोडले भागेको देखेपछि अरुले पनि किन भागेको, किन भागेको भन्दा मृग छप्ल्याङ आयो, छप्ल्याङ आयो भन्दै दौडियो । अब छप्ल्याङले खान्छ, मार्छ भन्दै सबै भागे ।
पुरै जंगलभरिका जनावर छप्ल्याङ आयो भन्दै भागे । अन्तिममा सिंह राजाकहाँ पुगेपछि छप्ल्याङ आयो सरकार, सबै सकिने भइयो भनेर सबैले रोइकराइ गरे । सिंह राजा भएकाले कहाँ आयो, खै मलाई देखाउ त भनेर सबैलाई लिएर पोखरी भएको ठाउँमा गयो ।
एकैछिन बस्दा अर्को आँप खस्यो र छप्ल्याङ भयो । अनि सिंहले लाटाहरु, तिमीहरुलाई खाने कुरा झरेको हो । मार्ने आएको हो त ? ल टिपेर खाउँ भनेर आँप खुवाएपछि सबै जनावरहरु शान्तिपूर्वक बसे ।
प्रचण्डले कार्यकर्ताहरुलाई भने- अहिले पनि केही-केही ठाउँमा छप्ल्याङ आएको छ । (हलमा हाँसोको फोहोरा छुट्यो) यो संविधानले फल दिएको छ । तर, छप्ल्याङ जस्तो पारिदिएको छ । अनि दौडिएको छ, दौडिएको छ । खत्तम पारे, हामीलाई त सिध्यायो भनिदिएका छन् ।’
प्रचण्डले छप्ल्याङको कथामा जस्तै अब कोही सिंह बन्नुपर्ने भन्दै त्यो भूमिका एमाओवादीले खेल्ने दाबी गरे । उनले भने, अब यहाँ कोही सिंहले भनिदिनुपर्‍यो कि यो छप्ल्याङ मात्र हो । खसेको त आँप हो, खाए हुन्छ । यो भनिदिने काम पनि आखिरीमा एमाओवादीले गर्नु पर्नेछ ।’
संविधानबारे एमाओवादीले तयार पारेको बुकलेट देखाउँदै प्रचण्डले भने, यो पुस्तिकाले राम्रोसँग मधेसमा वा अन्य ठाउँमा राम्रोसँग बुझायौं भने यो छप्ल्याङ डरलाग्दो कुरा आएको होइन, यो संविधानमा धेरैभन्दा धेरै अधिकार संस्थागत गर्ने ढंगले जनताका लागि मीठो फल भएर आएको हो भन्नुपर्छ ।’
www.onlinekhabar.com

काठमाडौं, १७ असोज । भारतका लागि नेपाली राजदूत दीपकुमार उपाध्यायले भारतले नेपालमाथि लगाउँदै आएको अघोषित नाकाबन्दी खोल्नुको कारण खुलासा गर्नुभएको छ ।
भारतीय पक्षले नेपालमा आफूविरुद्ध भएको प्रदर्शनपछि बाध्य भएर नाका खोल्न बाध्य भएको राजदूत उपाध्यायको भनाइ छ । नेपालमा भारतविरुद्ध भएको प्रदर्शनको सानोभन्दा सानो जानकारी राखेको भारतीय पक्षले यस विषयमा आफूसँग गुनासो गरेको खुलासा गर्नुभयो ।

भारतीय पक्षले नयाँदिल्लीमा उपाध्यायसँग शनिबार गरेको भेटमा नेपालमा भारतविरुद्ध प्रदर्शन भएकामा चिन्ता जनाएको हो । नेपालवाणी रेडियो नेटवर्कमा पत्रकार ऋषि धमलासँग आइतबार बिहान कुरा गर्दै नेपाली राजदूत उपाध्यायले भन्नुभयो, ‘भारतीय पक्ष नेपालमा भारतविरुद्ध भएका विरोध प्रदर्शन र झण्डा जलाउनेलगायतका कार्यबाट चिन्तित बनेको पाएँ ।’ भारतले नेपालमा आफूविरुद्ध प्रदर्शन भएको र नेपाली जनताले भारतीयको आलोचना गरी विरोध गर्न थालेपछि त्यसबाट दीर्घकालीन असर पर्नेभन्दै अघोषित नाकाबन्दी खोलेको राजदूत उपाध्यायको भनाइ थियो ।
राजदूत उपाध्यायले अगाडि भन्नुभयो, ‘भारतीय पक्षले नेपालमा आफूविरुद्ध भएका सबै गतिविधिको भिडियो हेरेर बसेको रहेछ । एउटा सानो बालकले नेपालमा भारतीय झण्डा जलाएको भिडियो पनि भारतीय पक्षले नयाँदिल्लीमा बसेर हेरेको रहेछ । म त अचम्ममा परेँ । छक्क परेँ । अहिलेको इन्टरनेटको जमानामा सबै कुरा जहाँ पनि पुग्छ ।’
मधेस केन्द्रित दल र तिनका सीमित नेताका कारण भारतविरुद्ध नेपालमा जनमत बनेको निष्कर्षमा पुगेको भारतीय पक्षले वीरगञ्जबाहेकका सबै नाका सुचारु गराउने आश्वासन आफूले पाएको नेपाली राजदूत उपाध्यायले बताउनुभयो । ‘सीमित व्यक्तिका कारण नेपाली जनताले दुःख पाए’, उहाँले भन्नुभयो, ‘औषधि र पेट्रोलियम पदार्थलगायतका सामान नेपाल प्रवेश गर्न दिने भारतीय पक्षले आश्वासन दिएको छ ।’
भारतले अघोषित नाकाबन्दी खोले पनि नेपाल–भारतको प्रमुख व्यापारिक नाका वीरगञ्ज भने नखोल्ने भएको छ । नेपाली राजदूत उपाध्यायले भन्नुभयो, ‘६० प्रतिशत व्यापार हुने वीरगञ्जको रक्सौल भन्सार नाका भारतले अझै केही दिन नखोल्ने भनेको छ । रक्सौल नाका नखुलेपछि अझै जनजीवन सुचारु हुन केही समय लाग्नेछ ।’
नेपालको अवस्था सहज हुन अझै पनि केही समय लाग्ने देखिएको छ । नेपालमा भारतीय सीमाबाट दैनिक हुने कारोबारमध्ये वीरगञ्जबाट ६० प्रतिशत एक्लै हुने गरेको छ। यसअघि वीरगञ्ज भन्सार नाकाबाट मात्रै दैनिक तीन सय बढी ग्यास र तेल बोकेका सवारी साधन दैनिक भित्रिदै आएका थिए ।
जनतालाई दुःख दिएर राजनीति नहुने भन्दै राजदूत उपाध्यायले भारतीय पक्ष पनि आन्दोलनरत मधेसी दलहरूसँग रुष्ट भएको जनाउनुभयो । उहाँले आउँदा दिनमा यस्ता गम्भीर विषयलाई सम्वेदनशील रुपमा दुबै पक्षले लिनुपर्ने उल्लेख गर्नुभयो ।
अघोषित नाकाबन्दीका समाधान चीनसँग तत्काल व्यापार नाका खोलर समाधान हुन नसक्ने बताउनुभएका राजदूत उपाध्यायले चीनभन्दा भारतसँगकै व्यापार उचित रहेको बताउनुभयो ।
dainiknepal.com

Home