प्रहरी र मोर्चाका कार्यकर्ताबीच बिराटनगरमा झडप
विराटनगर : विराटनगर–१४ को घाँसचौकमा बिहीबार साँझ प्रहरी र आन्दोलनकारीबीचे झडप भइरहेको छ । करिव साढे चार बजेबाट सुरु भएको झडप अहिलेपनि जारी छ ।झडपका कारण त्यहाँको स्थिती तनावपूर्ण बनेको छ भने जनजीवन त्रासपूर्ण बनेको छ । आतंकित स्थानीय बासिन्दा घरको ढोका बन्द गरेर बसेका छन् ।
एक्कासी झडप पर्न थालेपछि सडकमा विभिन्न सामान विक्री गरिरहेका व्यापारीहरु सामान त्यत्तिकै छाडेर भागेका थिए ।
प्रहरीले आन्दोलनकारीमाथि लाट्ठी प्रहार गरिरहेको छ भने घरमाथि लुकेर बसेका र चारैतिर रहेका आन्दोलनकारीले प्रहरीमाथि ढुँगा बर्साइरहेका छन् ।
संयुक्त लोकतान्त्रिक मधेसी मोर्चाले आब्हान गरेको बन्दका क्रममा सडकमा बालिएको टायर निभाउने क्रममा झडप भएको मोरङ प्रहरीका प्रवक्ता डीएसपी प्रमोदकुमार खरेलले बताए ।
स्थिति नियन्त्रण बाहिर जाने अवस्था उत्पन्न भएपछि झडप स्थलमा ठूलो संख्यामा सुरक्षाकर्मी परिचालन गरिएको छ ।
‘आन्दोलनकारीहरुले चारैतिरबाट प्रहरीमाथि ढुंगा प्रहार गरिरहेका छन्,’ खरेलले भने, ‘तर प्रहरीले संयममता अपनाएको छ । सामान्य बल प्रयोग मात्र गरेको छ ।’
उनका अनुसार अहिले सम्म झडपमा परेर कोही घाइते भएका छैनन् । प्रहरीमाथि ढुंगा प्रहार गर्ने तीन आन्दोलनकारीलाई पक्राउ गरिएको जानकारी उनले दिए ।
आन्दोलनकारी विराटनगरको महेन्द्र चौक छेउबाट शिवमन्दिरसम्म एकै पटक टायर बालेर प्रदर्शनमा उत्रिएका थिए । स्थिति नियन्त्रणमा लिन सशस्त्र प्रहरीले दुई सेल अश्रुग्यास प्रहार गरेको छ ।www.annapurnapost.com
0 comments
Write Down Your Responses