खासखुस्मा बस दुर्घटनामा मृत्यु हुनेको संख्या आठ पुग्यो
दाङ, ४ कात्तिक । बाँकेको खासखुस्मा गाविस–८ को चप्पर गौरीमा भएको बस दुर्घटनालगत्तै आगलागीका कारण मृत्यु हुनेको संख्या आठ पुगेको छ ।मंगलबार भएको दुर्घटनामा परेर मृत्यु भएका मध्ये हालसम्म आठ जनाको शवको कंकाल भेटिएको इलाका प्रहरी कार्यालय अमेलिया, दाङका प्रहरी निरीक्षक ज्योति शर्माले जानकारी दिनुभयो । शवको पहिचान भने डिएनए परीक्षणबाट मात्र गर्ने सकिने उहाँले बताउनुभयो ।
बुटवलबाट नेपालगञ्ज जाँदै गरेको लु१ख ५८२८ नम्बरको यात्रुबाहक बस दुर्घटना भई पल्टिएको दुई मिनेटमा आगलागी भएको थियो ।
आगलागीबाट बस पूर्णरुपमा जलेर नष्ट भएको छ । प्रहरीले बसमा अमेलिया चेक प्वाइन्टबाट ३३ जना यात्रु सवार रहेको जानकारी गराए पनि बसभित्र कति यात्रु थिए भन्ने अझै एकीन जानकारी नभएको जनाएको छ ।
बस दुर्घटना भएलगत्तै इलाका प्रहरी कार्यालय अमेलियाबाट घटनास्थल पुगेका प्रहरी निरीक्षक ज्योति शर्माले बस पल्टिएलगत्तै आगलागी भएका कारण यात्रुको उद्धार गर्न नसकेको बताउनुभयो ।
बसमा यात्रुले पेट्रोल तथा सिलिन्डर ग्यास राखेका कारण बस तातिएर आगलागी भएको अनुमान प्रहरीको छ ।
घाइते केहीले भने प्रहरीसमक्ष चालकको लापर्बाहीका कारण दुर्घटना भएको बताएका छन् । चालक अझै फरार रहेको र खोजी भइरहेको प्रहरीले जनाएको छ ।
मृतकको सनाखत हुन समय लाग्ने र घटनाबारे पूर्ण विवरण आउन बाँकी नै रहेको प्रहरीले बताएको छ ।
dainiknepal.com
0 comments
Write Down Your Responses