संविधान जारी भएपछि क-कस्को पद धरापमा ?
काठमाडौं, २९ भदौ । असोज ३ गते अपरान्ह पाँच बजे नयाँ संविधान विशेष समारोहमार्फत सार्वजनिक हुने कार्यक्रम टुङ्गो लागेको छ ।संविधानको परिमार्जित विधेयक २०७२ मा मतदान प्रक्रिया पनि जारी छ । संभवत संविधानको परिमार्जित विधेयकका सबै धारा आज (मंगलबार) पारित हुनेछन् । यदि समय अपुग भएमा भोलि (बुधबार)सम्म धारा पारित भइ संविधानको परिमार्जित विधेयक एकमुष्ट संविधानसभाबाट पारित हुनेछ ।
तर संविधान जारी भइ लागू भएपछि मुलुकको थुप्रै कार्यकारी पदहरू खाली हुनेछन् । यसरी खाली हुने पदमा राष्ट्रपति, उपराष्ट्रपति, प्रधानमन्त्री, मन्त्रीहरू, सभामुख र उपसभामुख रहेका छन् ।
संविधानसभाले जतिजति छिटो संविधानका धारा पारित गर्दै गएको छ, त्यतित्यति ती पदमा आसिनहरूको मुटूको गति बढ्दैछ ।
संविधान जारी भइ लागू भएपछि प्रधानमन्त्री सुशील कोइरालासहितका उपप्रधानमन्त्री र मन्त्रीहरूले पद छाड्नुपर्नेछ । त्यसै गरी राष्ट्रपति डा.रामवरण यादव र उपराष्ट्रपति परमानन्द झाले पनि पद छाड्नुपर्नेछ ।
सभामुख सुवासचन्द्र नेम्वाङ र उपसभामुख ओनसरी घर्तीको पनि पद जानेछ ।
पछि प्रमुख तीन दल कांग्रेस, एमाले र एकीकृत माओवादीबीच छलफल गरेर रिक्त हुने ती सबै पदहरू बाँडफाँट गरेर आआफ्ना पार्टीबाट पूर्ति गर्नेछन् । ती पदमा केही पुराना अनुहार पनि दोहरिन सक्ने नेताहरूको भनाइ छ ।
संविधानसभाबाट नयाँ जारी गरेर लागू भएपछि मुलुकका कार्यकारी पदसहित राष्ट्रपति, उपराष्ट्रपति तथा सभामुख र उपसभामुखको पद बाँडफाँट गर्ने दलहरूबीच पूर्व सहमति भइसकेको छ ।
पूर्वसहमतिअनुसार कांग्रेसले एमालेलाई सत्ताको बागडोर सुम्पनुपर्नेछ । एमालेको दाबीअनुसार मुलुकको नयाँ प्रधानमन्त्री अब अध्यक्ष केपी ओली बन्नु हुनेछ ।
ओलीको नेतृत्वमा बन्ने सरकारमा कांग्रेस, एमाओवादी, फोरम लोकतान्त्रिकसहितका दलहरूको सहभागिता हुने दाबी छ । दाबी आआफ्नै भए पनि नेताहरूले सत्ताका विषयमा अहिले नै केही बताउन चाहँदैनन् ।
तर एकीकृत माओवादीका उपाध्यक्ष नारायणकाजी श्रेष्ठले संविधान निर्माण भइ जारी भएपछि संयुक्त सरकार बन्ने बताउनुभयो ।
उहाँले त्यसको नेतृत्वका लागि एकीकृत माओवादीको दावी नरहेने भन्दै सरकारमा सहभागिताको विषय भने अस्वीकार गर्नुभएन ।
‘सरकारको नेतृतवमा हाम्रो दाबी रहँदैन’, उहाँले भन्नुभयो, ‘त्यो विषय कांग्रेस र एमालेले मिलाउने हो । हामी सरकारमा जान सक्छौँ ।’
dainiknepal.com
0 comments
Write Down Your Responses