सरकार र मोर्चाबीच कुरा अझै मिल्ने संकेत देखिएन, सीमांकन मिलाउन मधेसी मोर्चाको जोड -
काठमाडौं, ४ कात्तिक । सरकार र आन्दोलनरत संयुक्त लोकतान्त्रिक मधेसी मोर्चाबीच भएको वार्ता लचकतासका साथ अगाडि बढेको नेताहरूले बताएका छन् । तर वार्ता तत्काल सहमतिमा पुग्ने कुनै संकेत देखिएको छैन ।नयाँ सरकार आएपछि बनेको सरकारी वार्ता टोली र संयुक्त लोकतान्त्रिक मधेसी मोर्चाबीच आज (बुधबार) काठमाडौंको बिजुलीबजारस्थित तराई मधेस लोकतान्त्रिक पार्टीको कार्यालयमा भएको वार्ता सकारात्मकतर्फ उन्मुख भएको दाबी गरिएको छ ।
बैठकपछि जानकारी दिँदै तराई मधेस लोकतान्त्रिक पार्टीका महामन्त्री सर्वेन्द्रनाथ शुक्लाले मधेसी मोर्चाले राख्दै आएका विषयहरू आज पनि सरकारी वार्ता टोली समक्ष राखिएको बताउनुभयो । उहाँले अन्य दिनको तुलनामा दुबै पक्ष केही लचक देखिएको अनुभूति आफूले पाएको बताउनुभयो ।
वार्तामा सरकारी पक्षले नेपालीहरूको ठूलो पर्व दसैँका बेला पनि नाकाबन्दी गरेर आन्दोलन गरेको भन्दै मधेसी मोर्चालाई आन्दोलनको स्वरुप परिवर्तन गर्न आग्रह गरेको थियो । तर मोर्चाले आन्दोलनप्रति जनसमर्थन बढेको भन्दै यथाअवस्थामा आन्दोलनको स्वरुप परिवर्तन गर्न नसकिने जनाएको थियो ।
वार्तामा मधेसी मोर्चाले प्रदेश सीमाङ्कनबारे स्पष्ट र ठोस दृष्टीकोणसहित आउन सरकारी वार्ता टोलीलाई आग्रह गरेको छ । यस विषयमा अन्य दलसँग छलफल गरी धारणा सार्वजनिक गर्ने जवाफ सरकारी वार्ता टोलीले दिएको महामन्त्री शुक्लाले बताउनुभयो ।
सरकारी वार्ता टोलीका संयोजक एवं उपप्रधान तथा परराष्ट्रमन्त्री कमल थापाले वार्ता सकारात्मक भएको भन्दै मधेसी मोर्चालाई लचकता अपनाउन आग्रह गरेको जानकारी दिनुभयो ।
उहाँले सहमतिका लागि दुबै पक्षबीच लचकता आवश्यक रहेको र विगतको सरकारले मोर्चासँग गरेका सहमतिअनुसार अघि बढ्ने बताउनुभयो ।
वार्तामा सरकारका तर्फबाट संयोजक थापाका साथै सामान्य प्रशासनमन्त्री रेखा शर्मा, विना विभागीय मन्त्री रामजनम चौधरी तथा मधेसी मोर्चाका तर्फबाट महन्थ ठाकुर, हृदयेश त्रिपाठी, सर्वेन्द्रनाथ शुक्ललगायतको सहभागी थिए । अर्को वार्ता आइतबार दिउँसो एक बजे परराष्ट्र मन्त्रालयमा हुनेछ ।
http://dainiknepal.
0 comments
Write Down Your Responses