प्रधानमन्त्री ओलीको झापामा बृहद अभिनन्दन
विर्तामोडः प्रधानमन्त्री तथा नेकपा एमालेका अध्यक्ष केपी शर्मा ओलीलाई गृह जिल्ला झापामा बृहद अभिनन्दन गरिएको छ । बुधबार विर्तामोडमा आयोजित भब्य कार्यक्रमका बीच प्रधानमन्त्री ओलीलाई अभिनन्दन गरिएको हो ।नेकपा एमाले जिल्ला कमिटि झापाले आयोजना गरेको अभिनन्दन समारोहमा दुई दर्जन भन्दा बढी संघ संस्थाहरुले प्रधानमन्त्री ओलीलाई अभिनन्दन पत्रले अभिनन्दित गरेका थिए ।
अभिनन्दन कार्यक्रमलाई सम्बोधन गर्दै प्रधानमन्त्री ओलीले नेपाल भारत सीमामा भइरहेको अवरोध केही दिनमा हल हुने बताए । प्रधानमन्त्री निर्वाचित भएपछि पहिलो पल्ट गृह जिल्ला झापा आइपुगेका ओलीले केही समय दुःख भोग्नुपरे पनि चाँडै उक्त समस्या समाधान हुने बताए ।
प्रधानमन्त्री ओलीले स्वाभिमान नगुमाइ अहिले सीमा नाकामा भइरहेको अवरोधको समाधान गरिने बताए । गृह जिल्ला झापा आएका प्रधानमन्त्री ओलीले केही दिनमै उक्त समस्या समाधान हुने विश्वास दिलाए ।
उनले भने, 'हामी समस्याहरुको समाधान गर्दै जान्छौं । केही समय दुःख परेको छ । ति समस्याहरुको समाधान केही दिनमै हुन्छ । म तपाईंहरुलाई विश्वास दिलाउन चाहन्छु ।' तर उनले समस्या समाधानको समय सीमा भने तोकेनन् । प्रधानमन्त्री ओलीले अहिलेको सरकारमा सबै किसिमका दलहरुको प्रतिनिधित्व रहेकाले नेपाली कांग्रेसलाई समेत सरकारमा ल्याउने बताए ।
ओलीले भने, 'यो सरकार अहिलेसम्म नबनेको संरचनामा बनेको छ । सबैखाले दल सरकारमा छन् । कांग्रेसले समेत निहुँ खोजे तुरुन्त सरकारमा सामेल गराउँछौं ।'
सरकारमा पुगेपछि केही नेताहरु भ्रस्टाचारमा मुछिने गरेको प्रसंग कोट्याउँदै प्रधानमन्त्री ओलीले आफ्नो पुरानै ठट्यौली पारामा भने, 'तपाईंहरुले मलाई प्रधानमन्त्री बनाइदिनुभएको छ । भगवानका कृपाले मेरा छोरा छोरी छैनन् । मैले कसका लागि कमाउनु छ र । मैले कमाएर अरुले रजाईं गर्ने काम म बाट हुँदैन ।'
उनले एक बर्षभित्रमा लोडसेडिङ अन्त्य गर्ने, दुई बर्ष भित्रमा शतप्रतिशत जनतालाई शिक्षा दिलाउने, दुई बर्षभित्र सबैलाई बस्ने घरको व्यवस्था गरिदिने लगायतका सरकारका महत्वाकंक्षी योजना सुनाएका थिए । उनले देश विकासका लागि आफ्नो काममा साथ दिन सरकार बाहिर रहेका राजनीतिक दलहरुलाई आग्रह समेत गरेका थिए । annapurnapost.com
0 comments
Write Down Your Responses