मोर्चाका नेताले भारतीय नेताहरुसँग भेटघाटमा व्यस्त भोली प्रधानमन्त्री मोदीसँग भेट्ने
पटकमंगलबार, २२ मंसिरकाठमाडौँ । भारत भ्रमणमा रहेका संयुक्त लोकतान्त्रिक मधेसी मोर्चाका नेताले भारतका विभिन्न राजनीतिक नेतासँग भेटवार्तालाई जारी राखेका छन् ।
यसैक्रममा उनीहरुले आज बिहान इन्डिया इन्टरनेसनल सेन्टरमा नेपालका लागि पूर्वभारतीय राजदूतको समूहसँग भेटवार्ता गरेका छन् । भेटमा पूर्वराजदूत जयन्त प्रसाद, देव मुखर्जी, शिवशङ्कर मुखर्जी, श्यामशरणलगायतको सहभागिता थियो ।
यसअघि आइतबार हैदराबाद हाउसमा भारतीय विदेशमन्त्री सुष्मा स्वराजसँग भेटवार्ता गरेका मोर्चाका नेताले नेसनलिस्ट काँग्रेसका नेता करण सिंह, डिपी त्रिपाठी, जनता दलका अध्यक्ष शरद यादव, भारतीय कम्युनिस्ट पार्टी माक्सवादी का महासचिव सीताराम येचुरीसँग पनि छुट्टाछुट्टै भेटवार्ता गरेका थिए ।
आइतबार भारत गएको मोर्चाको टोली बुधबार स्वदेश फर्कने कार्यक्रम छ । मोर्चा आबद्ध तमलोपाका अध्यक्ष महन्थ ठाकुर, सङ्घीय समाजवादी फोरम नेपालका अध्यक्ष उपेन्द्र यादव, सद्भावना पार्टीका अध्यक्ष राजेन्द्र महतो र तराई–मधेस सद्भावना पार्टीका अध्यक्ष महेन्द्र राय यादव नेपालको मधेस आन्दोलनबारे भारतीय सरकार र भारतीय राजनीतिक दललाई जानकारी गराउन दिल्ली पुगेका हुन् ।
nepalsandesh
0 comments
Write Down Your Responses