दिल्लीमा राजेन्द्र महतोले यसरी सम्झिए भगवान पशुपतिनाथ
काठमाडौं, मंसिर २५ । संयुक्त लोकतान्त्रिक मधेसी मोर्चाका नेता तथा सदभावना पार्टीका अध्यक्ष राजेन्द्र महतो स्वास्थ्योपचारको बहानामा दिल्लीमै बसेका छन् । केही दिनअघि दिल्लीमा राजनीतिक भेटवार्ताका लागि गएका मोर्चाका नेताहरुमध्ये महतो र महेन्द्र यादव दिल्लीमै रहे पनि उपेन्द्र यादव र महन्थ ठाकुर नेपाल फर्किसकेका छन् ।
पछिल्लो पटक उनले इन्डो–एसियन न्यूज सर्भिस (आइएएनएस)सँग कुरा गर्दै ‘मधेस आन्दोलन अहिलेसम्म आफूहरुकै नियन्त्रणमा रहेको तर धेरैदिन यसलाई आफूहरुले नियन्त्रण गर्न सक्ने अवस्था नरहेको बताएका छन् ।
महतोले आइएएनएसलाई भने, ‘अहिलेसम्म आन्दोलन हाम्रै नियन्त्रणमा छ, यद्यपी विनाकारण ५० जनाको मृत्यु भइसकेको छ तर पनि आन्दोलन हिंस्रक भएको छैन ।’
उनले अगाडी भनेका छन्, ‘मधेसीहरुले लामो समयसम्म सबैकुरा सहन सक्दैनन्, मधेसी समुदायको माग पुरा नहुने हो भने उनीहरुले बन्दुक उठाउने दिन टाढा छैन, मधेसीहरुले बन्दुक उठाएकोखण्डमा के हुन्छ भन्नेकुरा भगवान पशुपतिनाथलाई मात्र थाहा छ ।’
उनले मधेस आन्दोलन धेरैदिन लम्बिनु भारतका लागि पनि राम्रो नहुने बताए । महतोको भनाईमा मधेस आन्दोलनकै बहानामा भारतविरोधी शक्ति मधेसमा सक्रिय हुन सक्छ ।
imagekhabar
0 comments
Write Down Your Responses